ye marhale bhi mohabbat ke baab men aa.e
bichhaḌ ga.e the jo ham se vo ḳhvab men aa.e
vo jis ki raah men ham ne bichha.e ghuncha-o-gul
usi makan se patthar javab men aa.e
na jis ko dast-e-hina.i ka tere lams mile
kahan se bu-e-vafa us gulab men aa.e
tumhare husn-e-nazar se hain mo’atabar ham bhi
jo ham kisi nigah-e-intiḳhab men aa.e
agarche misl hai ab-e-ravan ke reg-e-sarab
kahan se shorish-e-dariya sarab men aa.e
tire ḳhayal ka paikar saja hai siine men
ham is tarah tiri chashm-e-ḳhush-ab men aa.e
hava ke dosh pe us ne likha hai nam-e-‘ra.is’
ye sun ke log bahut pech-o-tab men aa.e
Leave a Reply