misal-e-sho.ala-o-shabnam raha hai ankhon men
vo ek shaḳhs jo kam kam raha hai ankhon men
kabhi ziyada kabhi kam raha hai ankhon men
lahu ka silsila paiham raha hai ankhon men
na jaane kaun se aalam men us ko dekha tha
tamam umr vo aalam raha hai ankhon men
tiri juda.i men taare bujhe hain palkon par
nikalte chand ka matam raha hai ankhon men
ajab banav hai kuchh us ki chashm-e-kam-go ka
ki sail-e-ah koi tham raha hai ankhon men
vo chhup raha hai ḳhud apni panah-e-mizhgan men
badan tamam mujassam raha hai ankhon men
azal se ta-ba-abad koshish-e-javab hai ‘shaz’
vo ik saval jo mub.ham raha hai ankhon men
Leave a Reply