Rasheed Qaisrani
maana vo ek ḳhvab tha dhoka nazar ka tha
us bevafa se rabt magar umr-bhar ka tha
ḳhushbu ki chand mast lakiren ubhar kar
lauTa udhar hava ka vo jhonka jidhar ka tha
nikla vo baar baar ghaTaon ki oT se
us se muamla to faqat ik nazar ka tha
tum muskura rahe the to shab saath saath thi
aansu gire the jis pe vo daman sahar ka tha
ham aaj bhi ḳhud apne hi saa.e men ghir ga.e
sar men hamare aaj bhi sauda safar ka tha
sahra ke sar ki maang hai ab tak vo ik lakir
hasil jise ghurur tiri rahguzar ka tha
kaali kiran ye gung sadaon ke da.ere
pahuncha kahan ‘rashid’ irada kidhar ka tha
Leave a Reply