Wahshat Raza Ali Kalkatvi
‘vahshat’-e-mubtala ḳhuda ke liye
jaan deta hai kyuun vafa ke liye
ashna sab hue hain begane
ek begana-ashna ke liye
ham ne aalam se bevafa.i ki
ek mashuq-e-bevafa ke liye
tha use zauq-e-ashiq-azari
ḳhuub main ne maze jafa ke liye
ghalib aa.i faramushi us ki
vaada taḌpa kiya vafa ke liye
ye bhi teri gada-navazi thi
main ne bose jo naqsh-e-pa ke liye
zauq-e-nazzara ne kiya hai ḳhaak
surma huun chashm-e-surma-sa ke liye
justuju nang-e-arzu nikli
dard rusva hua dava ke liye
baḌh chali hai bahut haya teri
mujh ko rusva na kar ḳhuda ke liye
hai ḳhamoshi mujhe zaban ‘vahshat’
fikr kya arz-e-mudda.a ke liye
Leave a Reply