Ye Jo Alfaz Ko Mahkar Banaya Hua Hai

Jaleel Aali

ye jo alfaz ko mahkar banaya hua hai

ek gul ka ye sab asrar banaya hua hai

soch ko suujh kahan hai ki jo kuchh kah paa.e

dil ne kya kya pas-e-divar banaya hua hai

pair jaate hain ye dariya-e-shab-o-roz aksar

baagh ik sair ko us paar banaya hua hai

shauq-e-dahliz pe be-tab khaḌa hai kab se

dard gundhe hue hain haar banaya hua hai

ye to apnon hi ke charkon ki sulag hai varna

dil ne har aag ko gulzar banaya hua hai

toḌna hai jo ta.alluq to tazabzub kaisa

shaḳh-e-ehsas pe kya baar banaya hua hai

jaan khapate hain gham-e-ishq men ḳhush ḳhush ‘ali’

kaisi lazzat ka ye azar banaya hua hai