saara aalam gosh-bar-avaz hai
aaj kin hathon men dil ka saaz hai
tu jahan hai zamzama-pardaz hai
dil jahan hai gosh-bar-avaz hai
haan zara jurat dikha ai jazb-e-dil
husn ko parde pe apne naaz hai
ham-nashin dil ki haqiqat kya kahun
soz men duuba hua ik saaz hai
aap ki makhmur ankhon ki qasam
meri mai-khvari abhi tak raaz hai
hans diye vo mere rone par magar
un ke hans dene men bhi ik raaz hai
chhup gae vo saz-e-hasti chhed kar
ab to bas avaz hi avaz hai
husn ko nahaq pasheman kar diya
ai junun ye bhi koi andaz hai
saari mahfil jis pe jhuum utthi ‘majaz’
vo to avaz-e-shikast-e-saz hai
Leave a Reply