kaise kahen ki chaar taraf da.era na tha
jaate kahan ki ḳhud se pare rasta na tha
jab saans le rahi thi daraḳhton ke as-pas
avaz de rahi thi koi bolta na tha
ḳhud se chale to rah-guzar a.ina ho ga.i
apne siva.e aur koi sujhta na tha
ab ke basant aa.i to ankhen ujaḌ ga.iin
sarson ke khet men koi patta hara na tha
parda hila ke bad-e-sahar duur tak ga.i
ḳhushbu kidhar se aa.i kisi ko pata na tha
guzri tamam umr usi shahr men jahan
vaqif sabhi the go koi pahchanta na tha
ai ‘ashk’ ik kitab paḌhi thi varaq varaq
vo tirgi thi lafz koi sujhta na tha
Leave a Reply