saaqi ko agar fikr-e-mudava bhi nahin hai
is kam-nigahi ka hamen shikva bhi nahin hai
vo jaur se baaz aaya ho aisa bhi nahin hai
aur shahr men zalim kahin rusva bhi nahin hai
achchha hai agar aap ka ho jaa.e ishara
tufan ka.i roz se uThTha bhi nahin hai
palkon pe chamakne lage ashkon ke sitare
honTon pe tabassum abhi aaya bhi nahin hai
kis daur men tum mehr-o-vafa DhunD rahe ho
ab dil men kahin ḳhauf-e-ḳhuda ka bhi nahin hai
kya janiye kya baat hai kya bhuul ga.e vo
muddat hui dil zor se dhaḌka bhi nahin hai
ai ‘shauq’ ghazal kahte ho aur tum ko abhi tak
alfaz baratne ka saliqa bhi nahin hai
Leave a Reply