Wali Alam Shaheen
mizaj-e-gardish-e-dauran vahi samajhte hain
jo rasm-o-rah-e-gham-e-ashiqi samajhte hain
vo kaun log the raas aa.i jin ko ghurbat bhi
hamen to ahl-e-vatan ajnabi samajhte hain
shikast-e-dil ka ye ik lazmi natija hai
huzur aap jise sadgi samajhte hain
baḌi latif hai ye lazzat-e-talab lekin
kuchh is ko tere gunahgar hi samajhte hain
chhupao ham se na ‘shahin’ raz-e-dil apna
ki ham zaban nigah-e-shauq ki samajhte hain
Leave a Reply