Naina Adil
farogh-e-shadabi-e-chaman ko mahakti mitti se phuut nikla hai narm sabza
haris-e-takhliq nam zamin ne gulon se daman udaas belon ke bhar diye hain
ajiib rut hai! ki budhi shakhon men saans leta hai sabz jauban
khayalon, khvabon ki rahguzar par chatak rahi hain hazar kaliyan
nigah-e-dil ke gazida goshe rahin-e-nikhat
faza ki poron men jaag utthi hai bhini khushbu, hava ke hathon men raushni ke jadav kangan
hava ke pairon men raqs karne lage hain ghungru
parinde rangin shaam odhe shafaq ki surkhi se khelte hain
damakte paani men ghusl karte hain chand taare
nahati kaliyon ki be-libasi ko kitni hairat se dekhta hai
nafis patton ki shaal odhe ghanera jangal
gulab ke surkh pairahan par, safed phulon ki pattiyon par!
samaat-e-shab men sabt karti hai os yuun jal-tarang naghme
ki giit vo jo azal se be-kal faza men gum the
utarne lagte hain dhadkanon ki hasin lai par, mohabbaton ke amiin ban kar
milan ki aisi sabih rut men husn deta aap dastak
tumhare dar par…
Leave a Reply