Poet
rahi gar sohbat-e-aghyar baaqi
to kaahe ko rahenge yaar baaqi
gareban men mire dast-e-junun ne
na chhoḌa naam ko ab taar baaqi
nahin ashiq ke tan men ḳhuun ki buund
rahi ai dida-e-ḳhun-bar baaqi
na chhoḌi shaiḳh ji sahab ke sar par
suna rindon ne kal dastar baaqi
rahega yunhi ta roz-e-qayamat
ḳhilaf-e-sub.ha-o-zunnar baaqi
mohabbat men buton ki mar miTe hain
raha hai ik faqat hunkar baaqi
vale is sard-mehri-e-falak ki
hai vo hi garmi-e-bazar baaqi
ye puchha main ne ik din apne dil se
havas hai tum ko kuchh ai yaar baaqi
kaha us ne agar mil jaa.e vo shoḳh
to kahna kuchh nahin zinhar baaqi
tire bimar-e-gham ko hai to bas hai
faqat ik hasrat-e-didar baaqi
evaz bose ke dil denge unhen ‘aish’
nahin ab is men kuchh takrar baaqi
Leave a Reply