Junaid Akhtar
ja ke suraj se mila din men bhi ghar se nikla
ba.ad muddat main charaghon ke asar se nikla
ab to mil jaati hain har moḌ pe ankhen achchhi
teri ankhon ka vo kanTa bhi nazar se nikla
kitni kam-go thi miri jan-e-suḳhan vo ḳhushbu
baat karne ka bahana bhi agar se nikla
jaane kis kis ko diye mere hazaron dil the
ye ḳhazana mire siine ke khanDar se nikla
mujh ko to gardish-e-dauran ne diya hai lahja
mera matlab to isi zer-o-zabar se nikla
vo bhi mahfil men chali aa.i hai pichhe pichhe
main to ghar se isi tanha.i ke Dar se nikla
jis ki chhanv men sukun paa.en suḳhan ke panchhi
peḌ vo meri hi mehnat ke samar se nikla
mujh ko le Duubi faravani ye sim-o-zar ki
saara mehnat ka maza luqma-e-tar se nikla
ho-na-ho is men koi raaz chhupa hai ‘aḳhtar’
kaam aksar to ḳhuda ka bhi bashar se nikla
Leave a Reply