phuul jab koi bikharta hai to hans dete hain
dard jab had se guzarta hai to hans dete hain
parda-e-zehn pe maazi ke jharokon se kabhi
ek chehra sa ubharta hai to hans dete hain
subh tak jalna pighalna hai hamari qismat
rang-e-shab yuun jo nikharta hai to hans dete hain
agahi bhulne deti nahin hasti ka maaal
tuut ke khvab bikharta hai to hans dete hain
zindagi johd-e-musalsal hai hirasan kyuun ho
valvala jab koi marta hai to hans dete hain
Leave a Reply