Aap Se Arz-E-Haal Karte Hain

aap se arz-e-hāl karte haiñ

vāqa.ī ham kamāl karte haiñ

aa.ina dil kā TuuT jaatā hai

laakh ham dekh-bhāl karte haiñ

usī zālim se hai umīd-e-vafā

apne dil se savāl karte haiñ

aap ke harf-e-talḳh bhī aksar

zaḳhm kā indimāl karte haiñ

zikr hotā hai jab hasīnoñ kā

pesh terī misāl karte haiñ

ham to aadī haiñ ġham uThāne ke

aap yūñhī ḳhayāl karte haiñ

tere andāz-e-bevafā.ī bhī

duur dil kā malāl karte haiñ

un kī mahfil meñ jo guzāre the

yaad vo māh-o-sāl karte haiñ

ham ne kī hai na ham kabhī ai ‘soz’

ārzū-e-visāl karte haiñ

Leave a Comment