Sardar Khan Soz
aap se arz-e-hal karte hain
vaqa.i ham kamal karte hain
aa.ina dil ka TuuT jaata hai
laakh ham dekh-bhal karte hain
usi zalim se hai umid-e-vafa
apne dil se saval karte hain
aap ke harf-e-talḳh bhi aksar
zaḳhm ka indimal karte hain
zikr hota hai jab hasinon ka
pesh teri misal karte hain
ham to aadi hain gham uThane ke
aap yunhi ḳhayal karte hain
tere andaz-e-bevafa.i bhi
duur dil ka malal karte hain
un ki mahfil men jo guzare the
yaad vo mah-o-sal karte hain
ham ne ki hai na ham kabhi ai ‘soz’
arzu-e-visal karte hain
Leave a Reply