Anwar Shadani
sunta hai mere ham-nashin kahti hai ye bahar kya
phulon se dosti na kar phulon ka e’tibar kya
bazi-e-dil ki maat par baḌh ga.e aur hausle
husn ki jiit jiit kya ishq ki haar haar kya
husn pe naaz kijiye aap magar na bhuliye
husn to chaḌhti dhuup hai dhuup ka e’tibar kya
de ke chaman ko apna ḳhuun mangta kab huun ḳhun-baha
main huun bahar ke liye mere liye bahar kya
lazzat-e-intizar men kho ga.e ham to ai ‘nadim’
apna bhi intizar hai un ka hi intizar kya
dil men hai anvar aaj bhi atish-e-gham se raushni
milti hai is maqam par sarhad-e-nur-o-nar kya
Leave a Reply