mere hisse men azal se koi ghar tha hi nahin
mujh se pahle koi ashufta-safar tha hi nahin
main tiri yaad ke saa.e men basar karta raha
is ḳharabe men koi aur shajar tha hi nahin
koi dam koi ghaḌi ro diya karte the miyan
teri furqat men qarine ka hunar tha hi nahin
ek darvaza jahan nuur bichha rahta tha
ek angan ki jahan koi bashar tha hi nahin
ek tasvir-e-tasavvur ki faravani thi
ik taḳhayyul ki zamane se idhar tha hi nahin
is qadar dard ki bharta hi na tha aah ye dil
is qadar ḳhauf ki phir koi bhi Dar tha hi nahin
Leave a Reply