Ameeta Parsuram Meeta
kah bhi duun hal-e-dil agar shayad
un pe ho jaa.e kuchh asar shayad
ab zamana hai bevafa.i ka
siikh len ham bhi ye hunar shayad
ba.ad muddat ke ye ḳhayal aaya
raas aaya nahin safar shayad
ham hi ab tak samajh nahin paa.e
kuchh to kahti hai vo nazar shayad
vaise to fasla nahin koi
kashmakash hai agar magar shayad
har nazare men us ka hi jalva
tum ko aata nahin nazar shayad
ajnabi ajnabi se chehre hain
ye nahin hai mira nagar shayad
niind taari hai asmanon par
ya dua men nahin asar shayad
ab koi aarzu nahin baaqi
ḳhatm hota hai ye safar shayad
mauj-dar-mauj ek nashsha tha
ab vo dariya gaya utar shayad
zindagi ab tujhe sanvare kya
koshishen saari be-asar shayad
ik jahan ajnabi raha ‘mita’
ik jahan mujh se ba-ḳhabar shayad
Leave a Reply