vo man ga.e to vasl ka hoga maza nasib
dil ki girah ke saath khulega mira nasib
kha.enge rahm aap agar dil bigaḌ gaya
ho ja.ega milap agar laḌ gaya nasib
shab bhar jamal-e-yar ho ankhon ke ru-ba-ru
jagen nasib jis ko ho ye ratjaga nasib
pahra diya hai daulat-e-bedar-e-husn ka
so.e jo vo baghal men to jaaga mira nasib
pahuncha ke meri ḳhaak dar-e-yar tak saba
ruḳhsat hui ye kah kar ab aage tira nasib
ai dil vo tujh se kahte hain meri bala mile
aise tire nasib kahan ai bala-nasib
jab dard-e-dil baḌha to unhen rahm aa gaya
paida hui chamak to chamakne laga nasib
dushman ko lutf-e-vasl ‘hasan’ ko gham-e-firaq
har shaḳhs ka juda hai muqaddar juda nasib
Leave a Reply