jab bhi ḳhalvat men vo yaad aa.ega
vaqt ka sail Thahar ja.ega
chand tum dekh rahe ho jis ko
ye bhi aansu sa Dhalak ja.ega
ek do moḌ hi muḌ kar insan
bam-e-gardun ki ḳhabar la.ega
main ne dekhe hain chaman be-parda
koi gul kya mire munh aa.ega
husn se duur hi rahna behtar
jo milega vahi pachhta.ega
aur kuchh der sitaro Thahro
us ka va.ada hai zarur aa.ega
un ki zulfon ki mahak le ‘danish’
is dhundalke ko kahan pa.ega
Leave a Reply