yuun hi galiyon men muqaddar dar-ba-dar mera bhi hai
kyuun nahin sunta miri tu kuchh agar mera bhi hai
qatilon ko ab saza ho ya na ho lekin kisi
hashiye par ik bayan-e-muḳhtasar mera bhi hai
main bhi jujha huun hava se us kabutar ki tarah
dekh vo andhi men uḌta ek par mera bhi hai
paanv tere raste tere safar tera magar
kyuun pasine men badan phir tar-ba-tar mera bhi hai
dard ki vaadi men aahon ka mohalla hai jahan
bas vahin pahli saḌak par ek ghar mera bhi hai
yuun na ho main baiTh ja.un teri paichal ke baghair
dhuup men sahra ki uktaya safar mera bhi hai
kaisa pagal-pan ki us ke shahr men deni hai jaan
ab kahan huun main akela ham-safar mera bhi hai
ik uchaTti si nazar ḳhali mohabbat ki nazar
asman ik chahiye mujh ko ki sar mera bhi hai
saath honge ham to sach men phuul khilte ja.enge
aap ka hi bas nahin tanha safar mera bhi hai
ḳhud se bhi milta nahin main tujh gale milne ke ba.ad
saath rakhne men tiri ḳhushbu hunar mera bhi hai
jab bhi kuchh main ne kaha kyuun aap tak pahuncha nahin
aap ka qasid yaqinan nama-bar mera bhi hai
Leave a Reply