jis ko hona hai vo in ankhon se ojhal ho jaa.e
us se pahle ki mira kaam mukammal ho jaa.e
main to bas dekhta rahta huun zaminon ke kaTao
aadmi sochne vaala ho to pagal ho jaa.e
kahin aisa na ho virane hon phir se abad
kahin aisa na ho har shahr hi jangal ho jaa.e
ye zamin jis pe hai gulzaron ki ta.adad bahut
ye bhi ho sakta hai kal ko vahi maqtal ho jaa.e
reg-zaron se buḳharat hi uThte hain magar
kaun jaane ki ye garmi koi badal ho jaa.e
mera pindar hi divar hai nakami ki
ye jo gir jaa.e to har ḳhvab mukammal ho jaa.e
Leave a Reply