Haseebul Hasan
ik taraf pyaar to ik samt ana rakkhi hai
husn valon ne ‘hasan’ kaisi saza rakkhi hai
us ki yadon ke gulistan ko hara rakhna hai
ik nadi aankh se ashkon ki baha rakkhi hai
raushni teri bhi vaq.at hai hamare dam se
ham andheron ne tiri shaan baḌha rakkhi hai
mujh ko hai ilm tu raton men kahan jaata hai
aj-kal main ne sitaron se bana rakkhi hai
ḳhun-e-sadat ne miTTi ko fazilat baḳhshi
ḳhaak men bhi mire maula ne shifa rakkhi hai
us ki ḳhvahish hai andheron men bhaTakta hi rahun
main diya laaya huun aur us ne hava rakkhi hai
itna qatil bhi nahin husn tira hosh men rah
in chhichhoron ne to be-par ki uḌa rakkhi hai
vasl ke lamhon ko mahsur kiya hai sahab
main ne is baar ghaḌi pichhe ghuma rakkhi hai
ḳhud maze se main tumhen soch raha huun hamdam
aur bistar pe faqat niind sula rakkhi hai
Leave a Reply