ujaD Ke Ghar Se Sar-E-Rah Aa Ke baiThe Hain

ujaḌ ke ghar se sar-e-rāh aa ke baiThe haiñ

ham apnī zid meñ sabhī kuchh gañvā ke baiThe haiñ

kahāñ tak apnī hī parchhā.iyoñ se bhāgeñge

ye log jo tirī mahfil meñ aa ke baiThe haiñ

ab āh-o-zārī-e-ġham-ḳhvār kā fareb khulā

ye mehrbāñ bhī vahīñ dil lagā ke baiThe haiñ

azāb-e-hashr kā kyā zikr ham se ai vaa.iz

ham is balā ko yahīñ aazmā ke baiThe haiñ

Leave a Comment