Afsar Mahpuri
mere liye sahil ka nazara bhi bahut hai
girdab men tinke ka sahara bhi bahut hai
dam-saz mila koi na sahra-e-junun men
dhunda bhi bahut ham ne pukara bhi bahut hai
apni ravish-e-lutf pe kuchh vo bhi musir hain
kuchh talkhi-e-gham ham ko gavara bhi bahut hai
anjam-e-vafa dekh len kuchh aur bhi ji ke
sunte hain khayal un ko hamara bhi bahut hai
kuchh raas bhi aati nahin ‘afsar’ ko masarrat
kuchh ye ki vo halat ka maara bhi bahut hai
Leave a Reply