kisi se rabt nahin hai kisi se pyaar mujhe
na jaane rahta hai phir kis ka intizar mujhe
har ek saans miri umr ko ghaTati hai
nafas ka taar hai goya kafan ka taar mujhe
miri bahar ko mausam ka intizar nahin
koi jo hans ke mila mil ga.i bahar mujhe
na be-qarar ho tu meri be-qarari par
taḌap taḌap ke ḳhud aa ja.ega qarar mujhe
ye dil ka aa.ina ab toḌne ke qabil hai
dikha.i deta nahin us men ru-e-yar mujhe
kisi ke husn ki main ne bahar dekhi hai
chaman ke phuul dikhate hain kya bahar mujhe
ye ḳhud-farebi hai meri ki ḳhud-faramoshi
na aane vaale ka rahta hai intizar mujhe
mire vajud se harakat to hai zamane men
agarche mauj ki surat nahin qarar mujhe
mire chaman hi se vabastagi hai donon ki
aziiz kyuun na hon phulon ke saath ḳhaar mujhe
‘jigar’ ke ḳhuun se ankhon men surḳh Dore hain
samajh raha hai zamana sharab-ḳhvar mujhe
Leave a Reply