ḳhirad vaala bhi apne aap se begana aata hai
jo un ki bazm se aata hai vo divana aata hai
na josh-e-mai na kaif-e-naghma-e-rindana aata hai
ik aisa vaqt bhi ai saqi-e-mai-ḳhana aata hai
bayan-e-dard dil ko va.iz-e-farzana aata hai
vo kya jaane haqiqat us ko to afsana aata hai
main chalta to huun ghar se janib-e-masjid magar naseh
qadam ruk jaate hain raste men jab mai-ḳhana aata hai
ḳhirad valon se jab hal mas.alon ke ho nahin paate
to phir is kaam ki ḳhatir koi divana aata hai
bahut mushkil hai in se bach ke rudad-e-alam kahna
ki afsane se pahle sahab-e-afsana aata hai
na jaane kaun si lazzat hai is sozish men ai ‘asi’
ki pesh-e-sham.a jalne ke liye parvana aata hai
Leave a Reply