dam-e-akhir kisi ka shikva-e-bedad karte hain
nahin hain hichkiyan rah rah ke ham fariyad karte hain
riha ho kar ham itni khatir-e-sayyad karte hain
nasheman raat ko din ko qafas abad karte hain
fughan sun kar miri vo naaz se irshad karte hain
kahan tu mar rahi ai maut tujh ko yaad karte hain
budhape men tujhe ham ai javani yaad karte hain
ab apni umr akhir is tarah barbad karte hain
ajab andaz se kahti hain dil ki hasraten mujh se
hamen ghar se nikalen ghar vo kyuun barbad karte hain
na ankhon men kabhi aansu na honthon par kabhi naale
na ham qismat ko rote hain na ham fariyad karte hain
gale men kyuun rag-e-jan ban ke khanjar rah gaya tera
kahin bismil se aisi shokhiyan jallad karte hain
ye kyuun hai dushmanon ko doston ko justuju us ki
vo mujh par rahm farmate hain ya bedad karte hain
girana hai hamen kuchh bijliyan sayyad ke ghar par
asar-khez ik nai tarz-e-fughan ijad karte hain
dil-e-muztar ki tasviren bhari hain kya muraqqe men
kuchh ustadi bhi is men mani-o-bahzad karte hain
hamare saath hai sayyad bhi yarab musibat men
kaleja munh ko aata hai jo ham fariyad karte hain
likha kis husn se khat men ki ham tujh se kashida hain
kashish harfon ki aisi hai ki ham bhi saad karte hain
uthunga yunhi mahshar men liye main un ke khanjar ko
gale mere lagate hain ye kya jallad karte hain
kahan vo hain kahan ham hain pada hai tafraqa yarab
vo ham ko yaad karte hain ham un ko yaad karte hain
miri surat jo dekhi ham-nashin se hans ke farmaya
yahi kohsar par ab matam-e-farhad karte hain
kabhi thodi si pi li lab nahin us ki bhi kuchh parva
alag goshe men baithe hain khuda ko yaad karte hain
mujhe dekha to bole mere kuche se nikal jaaen
ye dil men chutkiyan lete hain ya fariyad karte hain
buzurgi hai ki marte hain butan-e-shokh par ab bhi
‘riyaz’ is umr men kyuun aqibat barbad karte hain
Leave a Reply