Poet
ghair ke ghar ban ke Daali ja.egi
kyun-kar un ki iid ḳhali ja.egi
aap ne bandhi hai kyuun talvar aaj
kya miri hasrat nikali ja.egi
phans chuka dil ho chuki ashuftagi
ab tabi.at kya sambhali ja.egi
jaan ka dena mujhe manzur hai
un ki farma.ish na Taali ja.egi
un pe zahir ho na ai dil shauq-e-marg
tegh gardan se uTha li ja.egi
dil ko vapas tum se kya mangenge ham
de chuke jo shai vo kya li ja.egi
kyuun na vo bechain ho.enge ‘nasim’
sayyadon ki aah ḳhali ja.egi
Leave a Reply