Ghair Ke Ghar Ban Ke Dali Jaegi

ġhair ke ghar ban ke Daalī jā.egī

kyūñ-kar un kī iid ḳhālī jā.egī

aap ne bāñdhī hai kyuuñ talvār aaj

kyā mirī hasrat nikālī jā.egī

phañs chukā dil ho chukī āshuftagī

ab tabī.at kyā sambhālī jā.egī

jaan kā denā mujhe manzūr hai

un kī farmā.ish na Taalī jā.egī

un pe zāhir ho na ai dil shauq-e-marg

teġh gardan se uThā lī jā.egī

dil ko vāpas tum se kyā māñgeñge ham

de chuke jo shai vo kyā lī jā.egī

kyuuñ na vo bechain ho.eñge ‘nasīm’

sayyadoñ kī aah ḳhālī jā.egī

Leave a Comment