Arif Abdul Mateen
meri soch laraz uTThi hai dekh ke pyaar ka ye aalam
teri ankhon se Tapka hai aansu ban kar mera gham
dil ko naaz hai suljhav par lekin main ne dekha hai
suljhane se aur uljha hai teri zulf ka ik ik ḳham
din ke bolte hangame men akasr soya rahta hai
karvaT le kar jaag uThta hai raat ki chup men tera gham
hijr ke sanvla.e lamhon men aas bhi tanha chhoḌ ga.i
kis se puchhun kaun bata.e raat hui hai kitni kam
teri dhun men tujh se bhi shayad aage ja nikla huun main
tere pahlu men baiTha huun phir bhi ankhen hain pur-nam
tera gham ham divanon ko kis aalam men chhoḌ gaya
ek zamana ham se ḳhafa hai ek jahan se ham barham
Leave a Reply