koi pahle to koi baad men ayyar hua
apni ḳhvahish pe jo vabasta-e-darbar hua
ik tahi-jeb ki zaari koi sunta kaise
raa.ij aise hi nahin sikka-e-dinar hua
baat sultan se kya taḳhliye men us ki hui
maslahat-kesh batane pe na tayyar hua
muḳhbiri meri hui chashm-e-zadan men kaisi
qasr-e-dil hi men saara tha ki mismar hua
raah men aa.e hue shana-e-kohsar ke saath
abr Takra ke jo palTa to guhar-bar hava
apni haq-goi ke ba-vasf nigun-sari par
dosh par apne mira sar hi mujhe baar hua
haan ye mumkin hai magar itna zaruri bhi nahin
jo koi pyaar men haara vahi fankar hua
ik nazar us ne uchaTti hui ki thi ‘yasir’
aur phir shahr men rahna mujhe dushvar hua
Leave a Reply