dam-E-Ulfat Mein Phansa dil Hae dil Afsos dil

dam-e-ulfat men phansa dil haae dil afsos dil

ab na hovega riha dil haae dil afsos dil

vo use kya kya kahe aur ye sarakta hi nahin

ho gaya yuun be-haya dil haae dil afsos dil

milte hi zalim ne mujh ko chhod kar yuun yak-ba-yak

ho gaya mujh se juda dil haae dil afsos dil

ah-o-nale ki sada bhi ab to aane se rahi

mar gaya shayad mira dil haae dil afsos dil

kis tarah us se banegi hai bahut vo bevafa

aur mira hai ba-vafa dil haae dil afsos dil

main ne kitna dil ko samjhaya ki ab bhi ishq se

baaz aa dil baaz aa dil haae dil afsos dil

so na maana dil ne aur saude men akhir ishq ke

yuun divana ho gaya dil haae dil afsos dil

chhod kar mere taiin aur paas zalim ke rahe

aur sahe jaur-o-jafa dil haae dil afsos dil

phir to ‘asif’ ghair se kis baat ki kiije ummid

jab ki apna de dagha dil haae dil afsos dil