darbar men jab arz-e-hunar aur tarah ki
sultan ne mire fan ki qadar aur tarah ki
dekha jo zamane ne mujhe tirchhi nazar se
main ne bhi zamane pe nazar aur tarah ki
milta hi na tha koi mujhe ek tarah ka
main ne bhi to umr apni basar aur tarah ki
shahan ne bahut raah pe laana mujhe chaha
meri bhi tabi.at thi magar aur tarah ki
manzil jo miri dusre logon se alag thi
aise hi na thi meri Dagar aur tarah ki
lafzon se sada kaam liya main ne zirah ka
talvar miri aur sipar aur tarah ki
kuchh aur the yasir mire paigham ke tevar
aa.i thi udhar se bhi ḳhabar aur tarah ki
Leave a Reply