baat kah kar hansa gaya mujh ko
ik tamasha bana gaya mujh ko
ab to main bhi huun paan ka patta
aisa chuna laga gaya mujh ko
mujh ko pahle banaya putli phir
ungliyon par nacha gaya mujh ko
jo kisi samt bhi nahin jaata
aisa rasta dikha gaya mujh ko
le ke mere qalam ka ik bosa
‘mir’ ‘mira’ bana gaya mujh ko
zaḳhm phulon ki shakl ke de kar
apne fan se saja gaya mujh ko
ru-ba-ru aa.ine ke main bhi tha
chehra us ka dikha gaya mujh ko
mard-e-kamil jo haq-parast bhi tha
bolna sach bata gaya mujh ko
mere honTon pe honT rakh rakh kar
apni bansi bana gaya mujh ko
aa ke mere qafas men vo ‘panchhi’
chahchahana sikha gaya mujh ko
Leave a Reply