Naeem Gilani
had se baḌhti hui ta.azir men dekha jaa.e
ḳhvab ko ḳhvab ki ta.abir men dekha jaa.e
dekhne ko main faqat itna bacha huun ya.ani
mujh ko ik manzar-e-tasvir men dekha jaa.e
khul bhi sakta hai jahan par mira andaz-e-junun
zaḳhm jo halqa-e-zanjir men dekha jaa.e
sabr bhi jis ke nishane pe hai aur siina bhi
hausla kitna hai us tiir men dekha jaa.e
is qadar dida-e-giryan ka to haq banta hai
ab use nala-e-shab-gir men dekha jaa.e
tab kahin dard utarta hai rag-o-pai men ‘na.im’
sher jab ‘mir’ ki tasir men dekha jaa.e
Leave a Reply