ḳhair se ab hai vahan aap ka bimar ki bas
is qadar der laga di mire sarkar ki bas
ser hota hi nahin zauq-e-tamasha lekin
mujh se kahti hai miri jur.at-e-didar ki bas
hijr ke naam pe bhi vasl ke unvan se bhi
ishq ne itne diye hain mujhe azar ki bas
kis qadar thi vo nazar a.ina-kirdar na puchh
is qadar chuur hua hai but-e-pindar ki bas
na gham-e-dil ke hi bas ke na gham-e-dauran ke
itne azad hue tere giraftar ki bas
Leave a Reply