is ka nahin hai gham koii, jaan se agar guzar ga.e
dukh ki andheri raat men ham bhi charagh dhar ga.e
shan-o-shikoh kya hue, qaisar-o-jam kidhar ga.e
taḳht ulaT ulaT ga.e, taaj bikhar bikhar ga.e
fikr-e-ma.ash ne sabhi jazbon ko sard kar diya
saḌkon pe din guzar gaya ho ke niDhal ghar ga.e
lipTe rahe tamam raat phuul ki pattiyon ke saath
dhuup paḌi jo phuul par qatre farar kar ga.e
tundi-e-sail-e-vaqt men ye bhi hai koi zindagi
sub.h hui to ji uThe, raat hui to mar ga.e
gard-e-safar men kho ga.e, aise hazaron rah-rau
raah men jo Thahar ga.e, andhiyon se jo Dar ga.e
phir bhi kisi ra.iis ke dil ki tarah hai chashm tang
aap phire hain mulk mulk aap nagar nagar ga.e
khil ke rahenge dekhna char-su raushni ke phuul
raat ke dasht ki taraf naqsh-gar-e-sahar ga.e
ḳhaak men teri mil ga.i ‘faiz’ ke jism ki ziya
ab to dayar-e-mahvashan qarz tamam utar ga.e
Leave a Reply