na rasta koi us ka na us ka ḳhvab koi
paḌa na ishq pe aisa kabhi azaab koi
kisi ka husn tha yuun ansuon ke daman men
charagh jalta ho jis tarah zer-e-ab koi
zamane-bhar ki ataon men sirf us ka karam
karam bhi aisa ki jis ka nahin javab koi
tamazat-e-gham-e-duniya men us ko yaad kiya
to dasht-e-dil pe barasta raha sahab koi
agar fasanon ke pichhe koi haqiqat hai
to ḳhvab aur bhi hoga vara-e-ḳhvab koi
ye log bol rahe hain magar faza hai ḳhamosh
hamare ahd men aana hai inqalab koi
vo jab hujum ke narghe men aur tanha tha
to dekhne ki thi phir us ki ab-o-tab koi
ab us ki bazm se aa kar ḳhamosh rahta hai
tha bargah men ik roz baryab koi
har ek raah se haT kar guzarte ho ‘adil’
to is tarah se mila hai kabhi janab koi
Leave a Reply