Kaam Krodh Se Na-Waqif Hai Sudh-Budh Se Begana Bhi

kaam krodh se nā-vāqif hai sudh-budh se begāna bhī

varna ‘shāhid-shaidā.ī’ ko kaun kahe dīvāna bhī

sundar naarī apnī sundartā par kyuuñ iThlātī ho

aaj khilā jo ġhuncha hai kal ko hai use kumhlānā bhī

ham ne to begānoñ ko bhī apne paas biThāyā hai

un kī sabhā meñ jaa.ez hogā apnoñ ko Thukrānā bhī

tumre dhyān kī bansī pakḌe kab se raag alāpe hai

gopī shyām kī mīThī tāneñ aa ke zarā sun jaanā bhī

ik ghar ko do naam diye haiñ yūñhī duniyā vāloñ ne

sundartā kā rain-baserā ka.aba bhī but-ḳhāna bhī

Leave a Comment