Rishta-E-Dil Ko Der-Pa Rakhna

rishta-e-dil ko der-pā rakhnā

is ta.alluq meñ fāsla rakhnā

saarā aalam huā hai tang-nazar

dosto tum to dil baḌā rakhnā

aage baḌhne ke hausle ke saath

vāpsī kā bhī rāsta rakhnā

zindagī ke baḌe taqāze haiñ

ḳhud ko har-rang-āshnā rakhnā

shahr ko apnā jānñā lekin

zaḳhm-e-āvārgī harā rakhnā

bevafā sab na sab haiñ ahl-e-vafā

ye ta.assur milā-julā rakhnā

nahīñ dushvār jānñā us kā

haañ nazar meñ adā adā rakhnā

Leave a Comment