Syed Anjum Jafri
kuchh nahin duniya badal jaane ki gham-ḳhvani mujhe
haan magar ḳhud ke taghayyur pe hai hairani mujhe
dasht se lauTa to main huun ik bagule ka ḳhamir
dekhti hai kis nazar se ghar ki virani mujhe
ik zamane se su-e-bazar men nikla nahin
dars deti hai bahut yusuf ki arzani mujhe
sun liye bikhre hue gham main ne raton ke tamam
haa.e ai duniya abhi tak tu nahin pahchani mujhe
ahl-e-‘anjum’ ek din vo bhi zamana aa.ega
raas aa.egi zamin-e-fan ki sultani mujhe
Leave a Reply