shaeri jhuut sahi ishq fasana hi sahi
zinda rahne ke liye koi bahana hi sahi
khaak ki lauh pe likkha to gaya naam mira
asl maqsud tira mujh ko mitana hi sahi
khvab-e-uryan to isi tarah tar-o-taza hai
haan miri niind ka malbus purana hi sahi
ek udte hue sayyare ke pichhe pichhe
koi imkan koi shauq ravana hi sahi
kya karen aankh agar us se siva chahti hai
ye jahan-e-guzaran aina-khana hi sahi
dil ka farman sar-e-dast utha rakhte hain
khair kuchh roz ko takmil-e-zamana hi sahi