Bakul Dev
ye kis ki yaad ka dil par rafu tha
ki bah jaane pe amada lahu tha
chamakte hain jo patthar se yahan ab
unhin palkon men sail-e-abju tha
kashish tujh si na thi tere ghamon men
lab-o-lahja magar haan hu-ba-hu tha
ujale si koi shai bach ga.i thi
us ik lamhe men jab main tha na tu tha
thami ik nabz to uqda khula ye
ḳhamoshi ka sarapa ha-o-hu tha
mile ab ke to ro.e TuuT kar ham
gunah apni saza ke ru-ba-ru tha
kabhi ḳhushbu hua karte the ham bhi
kabhi qissa hamara ku-ba-ku tha
Leave a Reply