abdul-hafiz-naeemi

Honkte Dasht Mein Ek Gham Ka Samundar Dekho

honkte dasht men ik gham ka samundar dekho

tum kisi roz agar dil men utar kar dekho

niklo sadkon pe to hansti hui lashon se milo

band ankhen jo karo qatl ka manzar dekho

aanch qurbat ki na pighla de kahin tar-e-nazar

shola-e-husn ko kuchh duur se bach kar dekho

ye to kahte ho ki khud main ne katai gardan

koi hathon men hava ke bhi to khanjar dekho

astinen to kahin chupke se dho lo yaaro

ho kisi ko na shubah qatl ka tum par dekho

dar o divar se uthte hain ye shole kaise

dosto chal ke zara ghar ke to andar dekho

haDDiyan gal chukin ab to na ukhedo un ko

DhunD len phir ye naya koi na paikar dekho

main bhi is safha-e-hasti pe ubhar sakta huun

rang to tum miri tasvir men bhar kar dekho

ab to khilti hui kaliyon men na DhunDo mujh ko

raakh hote hue ik shole ka manzar dekho

phenk do tuuti ummidon ke ye tukde bahar

dil men rah jaae kirich koi na gad kar dekho

liye aina vafaon ka kahan phirte ho

hon na hathon men kahin andhon ke patthar dekho

ek muddat se hai logon ko ‘naimi’ ki talash

qasr-e-tanhai ki divaren gira kar dekho

More Poems

Leave a Comment