Sulaiman Areeb
nizam-e-shams-o-qamar kitne dast-e-ḳhak men hain
zamane jaise tiri chashm-ḳhvab-nak men hain
sharab-o-sher men uryan to ho ga.e lekin
faza-e-zat ke parde har ek chaak men hain
shagufta-e-lala-o-gul men bhi sab kahan nikhre
na jaane kitne shahidon ke ḳhvab ḳhaak men hain
tira visal zamistan ki raat ho jaise
vo sard-mehri ke pahlu tire tapak men hain
jo sar uTha ke chalen tum hi ik nahin ho ‘arib’
kuchh aise log abhi tak to hind-o-pak men hain
Leave a Reply