Aarzu Ko Ruh Mein Gham Ban Ke Rahna Aa Gaya

aarzu ko ruuh men gham ban ke rahna aa gaya

sahte sahte ham ko aḳhir ranj sahna aa gaya

dil ka ḳhuun ankhon men khinch aaya chalo achchha hua

meri ankhon ko mira ahval kahna aa gaya

sahl ho jaegi mushkil zabt soz o saaz ki

ḳhun-e-dil ko aankh se jis roz bahna aa gaya

main kisi se apne dil ki baat kah sakta na tha

ab suḳhan ki aaḌ men kya kuchh na kahna aa gaya

jab se munh ko lag gai ‘aḳhtar’ mohabbat ki sharab

be-piye aThon pahar madhosh rahna aa gaya

Leave a Comment