Wahshat

Ambarin Salahuddin

mujhe vahshat ka matlab kab pata tha aaj se pahle

kabhi aisa hua ye dil zara ghabra gaya

to kah diya ki dil bahut vahshat-zada hai

aur aisa bhi hua

gar sakht lahje men kisi ne baat ki

ya baat rad kar di

na koi kaam ho ya na niind aai

to phir bhi kah diya vahshat bahut hai

mujhe ye lafz achchha hi bahut lagta tha

par aise nahin dekho

ki main ne us ka matlab aaj samjha hai

main gum-sum to nahin chup huun

miri saari tavajjoh mere hathon par lagi hai

mere nakhun yuun hatheli men khube hain

dil ye kahta hai

ki meri ungliyan is jild ke niche dabe

ik iztirabi se khala ko pur karen

ya phaad dalen ab

kai lahren si bechaini se yuun karvat badalti hain

mira dil chahta hai ye

ki main khinch kar

ajab vahshat ke maqnatis se jud kar

khud apne kanpte hathon ki poron se nikal jaun

magar main apne siine se ubhar kar

aa atakti huun halq men

khushk hai jo pyaas se

un ansuon se

jo nahin bante

yahan main kahan jaun

na aage aa sakun main aur na vapas ja sakun main ab

main jaise band huun shishe ke dabbe men

main apne khvab se apne halq se

jis qadar koshish karun

bahar nikalne ki ubharne ki

to mera saans rukta hai

koi avaz aati hai

kahin andar hi lekin duub jaati hai

mujhe sab kahin par bhi nahin hoti

kisi ko main nazar aati huun par shayad

use bhi apne andar se nikalne ka koi rasta nahin milta