usi ke qurb men rah kar hari bhari hui hai
sahare ped ke ye bel jo khadi hui hai
abhi se chhoti hui ja rahi hain divaren
abhi to beti zara si miri badi hui hai
bana ke ghonsla chidiya shajar ki banhon men
na jaane kis liye andhi se Dari hui hai
abhi to pahle safar ki thakan hai paanv men
ki phir se juuti pe juuti miri padi hui hai
nai ruton ke muqaddas bulave to hain magar
salib vadon ki jo rah men ik gadi hui hai
main haath bandhe hue laut aai huun ghar men
ki mere pars men ik aarzu mari hui hai
agar bichhadne ka us se koi malal nahin
‘shabana’ ashk se phir aankh kyuun bhari hui hai