Khalid Mubashshir
mira vajud usi ki visal-gah men tha
usi ka vird mire dil ki ḳhanqah men tha
tumhare qaul-o-qasam par fareb kya khata
tumhara tarz-e-amal bhi miri nigah men tha
huruf-e-makr tire lab pe the magar zalim
mujhe fareb bhi khana vafa ki raah men tha
tamam sang-dili ya ki phir ghurur-o-hasham
kuchh aur us ke siva bhi jahan-panah men tha
Tapak ke dida-e-nam se sada.en deta hai
jo ek harf-e-tamanna dil-e-tabah men tha
mujhe to raas ai ‘ḳhalid’ yahi zamin aa.i
ye aur baat mira zikr mehr-o-mah men tha
Leave a Reply