hava ke saath zamin ka sukut TuuTa hai
kisi ki haan se nahin ka sukut TuuTa hai
vo jab gaya to ḳhuda ka ḳhayal aane laga
sukut-e-dil se jabin ka sukut TuuTa hai
hamari call ki ghanTi ka mo.ajiza dekho
ki sang hote hasin ka sukut TuuTa hai
kisi ke ashk ki shiddat-navaz dhaḌkan se
zamin pe arsh-e-barin ka sukut TuuTa hai
main sochta huun ki kachcha ghaḌa bhi pakka tha
isi liye to yaqin ka sukut TuuTa hai
Leave a Reply