Rahbar Jaunpuri
mahaul tirgi ka muqaddar baḌha gaya
ghar ka charagh ghar ke ujale ko kha gaya
dekha hai ham ne jalne lagi hain vo bastiyan
jin bastiyon se ho ke koi rahnuma gaya
insaniyat gharib bhaTakti hai dar-ba-dar
har shaḳhs apne ḳhaul-e-ana men sama gaya
ham ne pilaya ḳhuun har ik inqalab ko
ham ko hi inqalab ka dushman kaha gaya
‘rahbar’ ye zindagi thi bahut mo’atabar magar
mera vajud mujh ko tamasha bana gaya
Leave a Reply